nihâd ihsân beğ'e: mu'allim mektebi ile idmân yurdı arasında cereyân iden maça ben oyun değildir dimişdim. siz de mükemmel bir oyun olduğını iddi'â itdiniz, ben bu iddi'âmda dâimâ musırrım. zîrâ o günki maç spor kavâ'id ve nizâmâtına muvâfık bir oyun olmamışdı. herkes bilir ki, oyunlarda sıhhat içün tehlîke yokdır, endîşe yokdır. zevk, neş'e, sevinç, samîmiyet vardır.
'acebâ cum'a günki oyun hakîkaten bu arzûlarımızı tatmîn idecek bir mâhiyetde miydi?
elbette ki hâyır! bizim spordan beklediğimiz gāye, sporın vücûda nâfi' bir âlet olmasıdır. hâlbuki cum'a günki maç bu gāyeyi te'mînden uzakdı. eğer sporın hedefi, hîçbir şey'i düşünmeden sıhhati çetîn bir mücâdele ile tehlîkeye atmak dimekse, mu'allim mektebi - idmân yurdı maçı gāyeye muvâfıkdır!..
biraz evvel söylediğim gibi elde idilmek istenen netîceyi te'mîn idilmediği içün o günki maçın hakîkî bir maç olmadığını kemâl-i cesâretle söyledim. karâra gelince yazdığımız gibi oyun tarafeyn murahhaslarının muvaffakıyetiyle icrâ idilmişdir.
ben bunın 'aksini iddi'â idecek değilim, yalnız size şu sû'âli sormama müsâ'ade ider misiniz? 'acebâ murahhasların imzâladığı kâğıddaki karâr ne idi? oyunın ne şart dâhilinde oynanmasına karâr virilmişdi?
şu sû'âllerin cevâblarını virmek size düşmese de, mes'elenin çabuk anlaşılması içün bunları bi'z-zât muvazzahan serd itmeği münâsib ve muvâfık bulmakdayım. cum'a günki maçın hakîkî bir maç oldığını tarafeyn murahhaslarının imzâladığı karâra istinâden söylüyorsınız. karâr şu şekildedir: cum'a güni, erkek mu'allim mektebi ve idmân yurdı arasında yapılacak maç, kumluk sahası'nda yapılacakdır ve direklerin mevki'i de değişerek ortaya konacakdır.
sonra tarafeyn murahhasları bu karârı imzâ iderlerken sâhanın her husûsını düşündiler mi? 'acebâ bu vazîfe kimlere terettüb iderdi? bunı murahhaslar mı düşünecekdi? öğleden sonra her iki takım sâhaya geldiği zamân dizlere kadâr çamurda oynamak mecbûriyetini virdikleri imzâya mı medyûndılar. bir taraf oynamak istemezken o bir tarafın mütemâdî icbârı, virilen karârı göstererek diğer [tarafı] emr-i vâki' karşısında bırakmak içün mi idi?
bu vaz'iyet karşısında hangi takım sâhadan çekilir giderdi? gitse mağlûb add idilecekdi.
şu hâle nazaran arzû itmiyerek oyun oynamağa mecbûr değil mi idi?
karârda direkler sâhanın münâsib yerinde olmadığı içün değişdirilecekdi. nîçün değiştirilmedi, böyle resmî bir oyunda cezâ hatları nerede idi?
resmî maçlarda hakemin hükmini dürüst virebilmesi içün bunlar lâzım değil mi idi?
"idmân yurdı mağlûb olsa idi 'aynı mütâla'ayı serd idecek mi idiniz" diyorsınız. şuna kat'iyen emîn olmanız ki; evet. çünki izhâr itdiğim hissiyât her iki tarafa da şâmildir. fakat yazılarımızın böyle şahsıyete dökülmesi arzû olunır şey değil. benim nazarımda mu'allim mektebi, idmân yurdı yokdır. türk gençliği ve türk sporcılığı vârdır.
sâhanın fenâlığı bir ma'zeret teşkîl itmiyeceğini ve böyle kış mevsiminde her tarafda maç yapıldığını söyledikden sonra, galata saray ile süleymâniye maçını misâl gösteriyorsınız.
olabilir ve imkân dâhilindedir. fakat ıstanbul sâhası ile kumluk sâhasını mukāyese itmek doğrı olabilir mi?
böyle bir maç yapılabilir fakat bir oyun ve spor olabilir mi? ricâ iderim, herkes yanlış hareket idiyor diye bizim de mi 'aynı sûretle hareket itmemiz îcâb ider?
şuna kat'iyetle emînim ki, oyun oynanırken tarafeyn oyuncıları böyle bir vaz'iyete düşdüklerinden memnûn değildiler.
binâen'aleyh, maç kılıklı başlayan bu oyunun netîcesinden, ne mu'allim mektebi müte'essir olmalı, ne de yurd sevinmelidir. (6 nisan cum'a güni yapılan maç bir oyun değil, bir kuvvet işiydi. bu maçda, bedenî kuvveti fazla olan tarafın gālibiyeti bi't-tabi' me'mendi. oyunı kazanabilmek içün oyuncı olmak değil, vücûdlı olmak lâzımdı. her iki tarafın oyuncıları kendilerini öyle bir sâhada gösteremezlerdi ve nitekim gösteremediler de.
salâhiyet mes'elesine gelince: türk gençliği bir külldür. siz ve ben bu gülün içinde birer cüziz. mâdemki bu kül'ün içinde biz de dâhiliz, öyle ise bir küll içinden çıkan hey'et de bizimdir. şu hâlde kendimize 'âid ve nokta-i nazarlar serd idilmek neden ve nîçün hakkımız olsun?
seyircilerden kesret-i meşgûliyetimiz dolayısıyle türkiye idmân cem'iyetleri ittifâkı adana mıntakası merkez hey'etinden müttefikan ve cevâd beğ de fudbol hey'eti riyâset ve tenis hey'eti a'zâlığından müteferriden isti'fâ itmiş oldığımızın cerîde-i 'aliyenizde intişârını ve ihtirâmât-ı fâikamızın kabûlüni ricâ ideriz efendim.
türkiye idmân cem'iyetleri ittifâkı, adana mıntakası merkez hey'eti:
) 
